Zan-pol la gingn son zéléksion : son mayaz la lang la raport ali. Li pé ète kontan vik Sintandré i sava konète in dévlopman, vèy pa koman. Par koud’ sissan plas travay, biento nora pi assé dmoun pou travay dann komine-la. Sirman, i fodra alé rode travayèr Lo Port, sansa Sinte Sizane.
Ala, li sa pran l’avion pou li alé bate déssi la porte Borloo pou son gran lizine bio-gaz : toute bann déshé vèr, dépi Sinni, ziska Sinte Roz. I sava mète dann lizine Sintandré : i sa fé léstrésité an poundiak ! Léstrésité vèr an plis !

Mé kossa, mi antan dann radio ? Kossa mi oi dann télé, kossa in kamarad la sonn amoin, i di ? Oté, la pa vré, Zan-Pol la pa pèrde ! li la pa fé anou in n’afèr konmsa ? Ankor kissa la bate ali ? Konm li di li-mèm, dann né lo boug na ankor délé (konm li té i di pou défin Laurent). Quaziman in marmay, solman in marmay la kour ! Parl fète nana in n’ot marmay la gingn lo kou, sé Zanmari...

Mon dié ségnèr, kossa zot la fé bondié don : la rou la tourné Zan-Pol, yèr té lindi, zordi mardi, tansion nana in lion dovan la port Borloo. Pèrd pa out tan pou alé la-ba. La-ba galman banna nana mal kadik. Too late, mon vié ga ! Lé pli tar k’ou i mazine !

Justin