Zot i koné kan wi ariv lo poin i tarde pa wi sava pass l’ote koté, wi panss-konm mwin mi pans – lé pliské tan d’ète sèryé pars si i kontinyé konmsa – si ni kotinyé marsh dsu lo mir – nou va bate anndan é pèrsone i vépa bate dann mir.toulmoune i vé ariv o poin pou fé sorte noute péi épi son popilassion dann traka… Nou na pi santan dovan nou, nou néna lo tan mé pa pou gaté, pou nou ansorte anou.

Méami, ni pé ansorte anou pars ni koné kossa ni vize konm bu é koman nou va trape lo bu… Kan mi antan demoune apré krétik bande rényoné, mi di nèt é klèr, la pa o bute vizé. La pa bande rényoné la fote. La fote sète in sistèm i apèl néokolonyalism é sistème-la i pèrmète pan ou d’ansorte anou konm k’i fo.

Nou ni koné noute ziontéré : nou la fine di sa in bonpé foi, kissoi dann program bande zilé jone, kissoi dann program parti kominis, kissoi sak bande zassosyasion i propoze, kissoi sak ni koné k’i fo fé é k’i pé fé pou noute péi épi son popilassion.

Alor néna in kanpagn zélékssyon i sorte komanssé é néna bonpé jenn néna bon-bon zidé. Noute parti li mèm i apiye o moins kat list kandida é banna sé dé kandida valab népi déssidé pou sèrv lo zintéré bande rényoné. Alor konm i di « du passé alon fé table raz » pou nou konstrui l’avnir… Mézami lo péi é l’moune i konte dsi zot bande zékip jenn.

Lé pliské préssé pou fé avans lé shoze,

La Rényon i konte dsi zot… A bon ékoutèr salu !

Justin