Sak mi sava rakonte azot zordi lé pa in n’afèr nouvo pou vréman mé ni pé dir la prèv shé nou ossi so lidé d’in souvrènté alimantèr i fé son shomin é sak mi di azot la spass mardi passé dann la foir Brapanon.

Zour-la é zour-la solman l’avé in séanss pou fèr goute demoune in kalité d’pain avèk ravaz. Dabor néna la farine l’Irat la fé avèk manyok, patate épi banane. Aprésa néna la kuisson é in partaz pti morso pou fé goute sa bann moune lété zour-la dann la foir.

Mwin la vi dann télé la réakssion dmoune pou dir zot i yèm sa é zot lé paré pou manz sa kan la prodikssion va komanssé… Pa koméla biensir pars l afarine lé ankor shèr mé dann in fitir lé pa tro loin. Kanstréti avèk la bétiz bann grn péi lo transpor par bato sansa par avion lé riskab tonb an pane

A ! Biensi sé kékshoz i égziss déza dopi plizyèr z’ané kan dann sèrtin péi gouvèrnman la désside ranplass la farine do blé avèk la poude patate, magnok, banane épi d’ot séréal ké lo blé, anfin de koi fabrik in produi péi avèk bann prodikssion péi.

Zot va dir amwin kossa sa i ansèrv ?

Mon réponss sé doplizanpli kréol i manz de pain kan an altèrnanss avèk dori kan zot lé in pé préssé par lo tan. Anplisské sa mi poi sa dann in valorizassion nout bann produi péi an ranplassman la farine do blé..I n’ot réponss pou fèr fass la guèr in pé partou épi lobligassion nou lé d’dan pou done la valèr nout bann prodikssion.

Nou lé an plin dann la préparassion la souvrènté alimantèr-si zot i vé lotonomi alimantèr — avèk bann linvanssion konm sète mwin la anparl zordi.

A bon antandèr salu !

Justin