Oté

« Lé préférab abiye aou ké nouri aou »

In kozman pou la rout

Justin / 8 zanvié 2018

JPEG - 43.6 ko

Désèrtin moun lo vant la poin lo fon. Sa i manz ! I manz ! i manz ! i diré zot i arèt ar pa zamé. Mi pans konm moin zot la fine trouv demoun konmsa dann z’ot vi é la plipar d’tan alé pa kroir zot lé gro, sansa graé, souvan dé foi zot lé mèg konm in z’arète. I diré, lo manzé i pèrd par la dann in fon pèrdi. Etan pti moin la trouv demoun konmsa é moin la touzour admir z’ot kapasité pou mète anndan. Solman oila, mi koné pa si zot téi manz toulézour sak zour matin, onzèr, lo soir. Pars mèm koméla na d’moun i fé pa troi ropa… an touléka pa toultan. Zot i dir ar pa ou, ni moin, ni d’moun étranj pars zot néna konm in ont dsi la késtyonn manzé. Moin lé sir si zot té i gingn détak in pé z’ot parol zot noré dé shoz pou dir dsi lo konplèks goni vide pars d’apré sak moin la tandi dir, sa la pa in kréyon déyèr l’orèy. Alé ! Pans kant mèm sa si zot i gingn dégaz in tan é ni artrouv pli d’van sipétadyé.