Donk mwin té apré ékoute la radyo kan in madame la di èl i travaye pa, èl néna troi zanfan, èl i viv tousèl, é èl i toush larzan la kaf… Konbien ? Kate sink mil éro par-la o mwa d’apré o madame dann téléfone. Ala ké lo lanimatère i domande aèl si èl lé sire, si sa sé son droi pou vréman, si èl la pa tronpé é pou ranforss son poinn-vizé èl i azoute, èl néna in kopine dann mèm ka k’èl é i touish lo même larzan. Lo lanimatère in pé pliss i gingn sézisman é li domande si toute demoune konmsa la pa père in zour in gouvèrnman i désside koupe toute.

Lo madame sé d’dire èl nora préfère travaye, mé in travaye wi gingn in kantité larzan konmsa sa i trouv pa sou la pate shoval.. Lanimatère i félissite lo madame pou son kouraz é i rouvèr l’antène pou toute in bande maloki k’i rante dann volan demoune i viv avèk larzan la Kaf, san travaye. Mi koné pa kossa zot i panss mé mi domande amwin touzour kèl fanm seul avèk troi marmaye i pé toush larzan la kaf konmsa. Mwin la parti rode-rode in pé dann bande préstassion la Kaf é fransh vérité, mi oi pa koman in famiye konm sak lo madame la kozé i pé toush in kantité larzan konmsa. Même an rèv sa i ariv pa !

Si mwin lété lo lanimatère mwin noré domande lo madame in rolvé d’droi pars sanm pou mwin néna in gro lakume dann laritmétik in pé ou sansa mwin té a d’mandé si lo madame la pa in shèftène mantère é toute sak la kozé apré mi diré zot lé parèye. Apré mwin la pans in kozman k’i di konmsa : « I vo myé antande sa k’ète sour ! ». Pou mwin lé pli préférab « ète sour k’antande sa ». Kèl bo péi La Rényon ! Bande pov lé rish é bande rish lé pov antouléka si mi kroi déssèrtin.

Justin