Zot i koné lo provèrb : "Dé poul i kouv pa dann mèm ni !". Zot i koné osi, souvan dé foi lo fanm épi l’onm na poin mèm l’opignon dsi la fason zèr in ménaz,aranz lo kaz, fé lo zardin... A, kan inn i vé mète l’angré l’ot i vé pa. An sak i konsèrn lo zardin, In zour mi di, i vo myé pa mète l’angré pars l’angré i tyé bann vèr d’tèr. Mon govèrnman i domann amoin si mi manz vèr d’tèr. Mi réponn, mi manz pa vèr d’tèr mé vèr d’tèr i travay pou nou, pou fèrtil la tèr-pa li tousèl, mé li sé in bon zouvriyé pou la bitasion.

L’èr-la, mi sar fouy in pé dsi lintèrnet, ép mi oi i amontr songn vèr d’tèr, kisoi dann in poubèl, kisoi dann in résipyan fé pou sa, kisoi ankor dann bann fèrm lonbrikol. In pé i domann mèm k’i fé lo lonbri-konpostaj donk k’i fé lo konpos avèk l’ède bann vèr d’ tèr. Pou kosa ? Pars vèr d’tèr i travay bien bann déshé é i transform sa an in bon fèrtilizèr, mèm in l’angré natirel. L’èr-la pou koué s’an-pas in zanimo konmsa ou la mèm pa bézoin done ali manjé, li travay solman lo réstan,li pran pa in bonpé la plas épi li rann aou bon z"afèr avèk in n’afèr l’apré ankonb aou... In pé i di li lé pa zoli, na mèm in gli dsi li, li lé dégoutan mé afèr alé rogard sa. Tout fason li lé la plipar d’tan dsou la tèr, sansa anfonsé dann déshé. alor, li rann aou sèrvis, pran son sèrvis, mèm alé pa déranj ali sé konmsa ké li san ali pli bien.

Mé bann fèrm lonbrikol i fé pa arienk konpos, Zot i fé d’ot shoz ankor : mélanzé èk la tèer sa in done in bon téro, konpos li mèm sé in bon l’angré natirel, épi vèr d’tèr sa i vann époi sa i ashète... An pliské sa, akorz pa fé travay inn-dé moun si lo la ntropriz i marsh bien, akoz pa an avoir in konpléman pou la famiy... Moin la vi kékpar i fabrik manzé zanimo avèk lo vèr. Solman si kréol i manz gèp avèk zandète moin la pa antandi dir na d’moun i manz vèr d’tèr an moulan ali. Mi arète la ! Sak i vé konète i foli sar fouyé dann l’internet et sirtou lé proférab zot i manj pa sa an manzan zot vyann moulé.

Justin

NB "Dé poul i kouv pa dann minm ni". Kosa sa i vé dir ? Sa i vé dir, momon èk son fiy i pé pa fé zanfan an mèm tan dann mèm kaz, pars lé riskab la poin l’antant. Sa i vé dir osi, lé pa posib an avoir dé ménaz dann minm kaz, sansa tansion la bagar. Moin la konète in ga l’avé son madam épi son métrès dann mèm kaz, é mi pé dir azot lé shoz la mal pasé. Sans prop, mé sans figiré ? Lé pa posib dé l’antropriz i fé mèm z’afèr dann m-èm téritoir, avèk lo mèm kliyan, é mèm fason san k’inn sansa lé dé i pran lo fon. kosa zot i anpans de sa zot ?