Matant Zélida la ékrir Justin :
Mon shèr nové, mon spès salté,
Si mi konpran azot bien, zot, bann rouj de fon, zot i antien pa d’ète an dézakor avèk zot mèm. I jenn pa zot pou malparl in n’afèr é apré rogrète son dézagréman. Par égzanp, tout listoir zot parti i amontr zot i pass zot tan pou krétik bann kapitalis. Di pa moin la pa vré ! Di pa moin zot la pa pass zot tan pou fé mont la kolèr bann plantèr kont bann l’izinyé. Fit-in-tan, zot té i réklam la réform agrèr pou mète bann gro propriyétèr dsi la paye. Di pa moin non, pars sak mi di lé vré pou vréman. Zordi, bann gran famiy l’apré pèrde tout zot patrimoine La Rényon, sé lèr ké, sanm pou moin, zot i rogrète in n’afèr konmsa. Lé tro tar ! Té i falé oir sa dépi avan ! Avan l’èr la pa l’èr, apré l’èr la pi l’èr ; Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
La pa pars out mémoir i flansh ké ou i pé dir ninport de koi dési nou. Souvien aou ! Paul Vergès la pa amène lo konba pou anpèsh fèrm l’Izine Kartyé Fransé ? Pou kosa li la pran par so bagar-la ? Pars dann in n’afèr konmsa, bann plantèr té riskab ète an difikilté, é li la trouv lété itil fé l’alyans avèk désèrtin l’izinyé pou anpèsh l’izine disparète. Sa lé koni, na mèm in pyès téat la tourné la dsi.
Zordi Téréos la fine kapar nout dé l’izine sikriyèr, in ot sosyété la fine pran nout dé l’izine éléktrik sarbon-bagas... Vi konpran bien, sa sé lo patrimoine rényoné k’i sava dann posh lé zot. Nana in bonpé konba konmsa bann kominis la améné. Solon ou, pou kosa ? Pars nou la touzour vouli dévlop nout péi, modèrniz ali, amontr la valèr bann Rényoné. Amont nou lé kapab, é nou lé pa so bann z’asisté konm in pé i di sa.
Zordi nana plin la ménas dési nou, dési nout lékonomi. Nana bann APE ! Nana bann prozé Sarkozy kont bann réjyon iltrapériférik. Kisa i bouj ? Pa la droit touléka ! Sak i bouj, sé parti kominis épi sak lé alyansé avèk li. Pou kosa ? Pars si i kontinyé, lé riskab ral anou déyèr, é pa pou zoué siouplé !

Justin