So matin, mwin la antann dann in radio in linformassion konm de koi lo shikomori, lang matèrnèl demoun bannzil Komor i sava fé son rotour dann lékol lo péi… Sa la ramène amwin in bon boute tan an aryèr, dann tan Prézidan Ali Soili – in pé i di li sé lo Sankara bannzil komor-mor dann in konplo l’ané 1978 apré in konplo monté par Bob Denard, in mèrsenèr solon sèrtin in kréatir bann sèrvis sogré franssé.

Dann tan-la Ali Soili l’avé vouli dé-postkolonializ son péi é li l’avé fé in bonpé réform avèk inn dann lansègnman pou fé rante lo shikomori dann program lamontraz bande marmaye. L’avé fé in formassion bande mètr, l’avé galman fé in progression dann bande program, épi la done lo shikomori lang matèrnel bande komorien in léstatu pli konsékan... Mé La France-afrik téi vèye sa konm lé dsi l’fé é in bozour, paf ! Kou d’éta é lo prézidan lé mor pou lèss la plass in sèrtin Ahmed Abdallah.

Mé oila pliss trantan apré gouvèrnman la désside rofé léspèryanss fé rorantre la lang matèrnèl banna dann l’ansègnman zot péi, donk avèk kékshoz an pliss dann son stati par raporte sak li l’avé dopi in boute lo tan. Mi panss sa in bon nouvèl an atandan biensir ké lo bande tèks ofisyèl i sorte dann zoinal é ké lo bande tèks i rante dann laplikasyon. Alé ! Alon suiv sak va éspassé pars pou linstan lo shikomori na poin la plass i mérite ali. Mé alon kalkil in kou !

Mayotte ossi néna son lang, lo chimaoré si mi tronp pa ! In lang avèk in patrimoine kiltirèl ossi intéréssan ké lo shikomori donk i fodré i okipe in pé done lang-la, la plass i mérite ali dann la sosyété, la vi épi la kiltir bann maoré. Nou va rotrouvé avèk mi éspère d’ote bone nouvèl konmsala.