I di konmsa ; la Réjyon la-ba l’apré fé in l’éfor pou mète l’anploi anlèr. I di konmsa, banna i vé dévlop l’anploi par ponyé. I di, mé moin lé pa sir nana vréman la volonté, pétète nana solman konm in l’anvi, sak dann diksyonèr i apèl vélléité. Zot i konpran amoin mi éspèr !

In shif pou fé gingn Sarko zéléksyon
Moin la lir par-la, i vé fé vinn-sink mil post travay. Sa in l’objéktif bandé sa... Byi bon, mèm tro bon. Pou kossa ? Pars si ou i raporte sa in péi konm la Frans, sa i fé dé milyon plas travay. Siouplé, méssyé Didier, ou gingnré pa souf sa dann zorèy Sarko ? Li sar fyèr !

Vi koné li lé frazil !
Pou lo moman, i oi aryink siprime bann plass travay La Rényon. Dis mil l’ané 2009, byinto dis mil l’ané 2010, sa i fé vin mil, si mi tronp pa. É si ou i kal sa déssi in péi soisante milyon demoun, sa i fé in milyon sink san mil shomèr an plis. Di pa sa Sarko, li va tonm rède. Pran prékossyon pou son kèr !

A ! Ala in bon l’idé pou zot ! I sifi d’rokil an aryèr, armète anlèr tout sak zot lé fine kassé dépi moi d’mars. Dé-sign Matignon2, ar-sign Matignon1, arfé lo tram-train, arfé san tardé la route litoral kat voi, épi lo rèst... Lé sinp, mé i sifi d’fé travay son l’imazinasyon.

Justin

NB : vi koné, dann program parti kominis, na bon pé bo z’idé ossi ?