Dann in mwa tou ziss ni sar voté pou élir bann konséyè départmanto. Pou 25 kanton, néna 128 binonm dan tout la rényon konm kandida déklaré i prétan é final de kont nora 50 éli. Néna désertin binonm lé an ki si tèt, i tyinbodra pa la rout lontan sanm pou mwin vik lé in pé kont natir. Mé lé konm sa. A nou osi nou lé an parmi é shakinn i ral son sharèt pou ésplik in pé domoun lo zéléksyon, kansréti pou d’moun voté. Donkalor ni pass kaz an kaz è knout papié, pou ésplik nout program.

In boug in pé abitié èk mwin i di « Justin, pou domoun mié akèy a zot, i fo glis in biyè 100 ero dann zot program ». Mi sipoz té pou kass lé kui, konm li koné a mwin byin. Mi réponn a li « Daborinn, mwin lé oki, donkalor, kont pa si mwin pou fann la poud, aprésa si mi donn a ou 100 ero sa i voudré di ou vo pa pliss ké 100 ero. Mi réspèk tro d’moun pou éstim a li an éro bayoun ». Li rodi a mwin ou sar rèt a tèr, ou gingn arpa sobat èk lo prézidan d’rézyon vik li distribi larzan an poundiak. Minm dan la sominn zournal la di, li minm sora rééli, parsk o plis li distribi, o plis li mont dann sondaz.

Donkalor, sot a ou an lèr, bat a ou a tèr, sar li minm, lé pa otroman. Pou kass a mwin ankor plis li di a mwin ou va war koman banna i fé la ké pou kapar byè, banna va fé la ké pou voté. Kisa i sar galiz èk li èk tousa larzan ? Di a mwin, na lo dwa distribié larzan konm sa dann in lané éléktoral ? Néna d’moun pou kontrol a li ? Konsidèr li fé son kanpagn èk nout larzan. A nou osi, anon pa rant dan la ponp, anon fé war ni vo plis ké 300 ousinon 450 ero ? Touléka, sak néna pouvwar, lé tan rouv lo zié la d’si.