Sa sé in kozman mon défin papa téi yèm di kan demoun i oi pa pli loin k’zot bout né i pran in désizyon san rogard kisa k’i pèrd épi kisa k’i gingn. Sa sé in n’afèr k’i ariv toultan pars la konsantrasyon épi la rofléksyon, souvan dé foi, la pa in kalité niméro inn shé lo moun. Néna an parmi l’moun sak i rofléshi, sak i kalkil, lo pour, lo kont, lo pétète é lo pétète pa. Apré, boudikont, afors pran in désizyon i annui azot zot i anvoye baladé é kan in zistoir tort i ariv zot i di la pa zot l’otèr… Kisa l’otèr alor ? Lé zot biensir. Touzour l’ot l’otèr. Ala in bon règ défans pou bann ti marmaye. In romark kant mèm : souvan dé foi bann ti marmaye i rofé sak zot i oi bann gran moun i fé z’ot kaz, sansa dann z’ot famiy prop, pétète bann z’ami z’ot prop famiy. Alé ! Mi lèss azot rofléshi la dsi é ni artrouv pli d’van sipétadyé.