Somenn passé dann in gran tournoi èl la gingn médaye d’or é sa sé in gran nouvèl pou bann demoune i fé judo, pou bann zantrénèr, é final de kont pou tout rényoné. Sirtou ké i tard pa fé bann séléksson pou bann zé zolinpik, avèk inn bone shanss gagné- inn rényonèz shanpion olinpik, sa sé kékshoz nou la zamé gagné é lo péi néna bone shanss gagné dann proshin zé zolinpik.

Biensir nou rényoné, sa sé in gran lévènman pou nou é konm i di, wala in moune l’apré mète La Rényon anlèr é ni souète d’ot va suiv son légzanp.

Mé biensir si demoune normal lé kontan néna kan mèm demoune zalou é banna lé pa kontan, si tèlman la mète a kritik aèl dann bann rézo sossyo pou son fizik, pou son poi, é biensir toussala ni vi ni koni ; zot i koné koman bann rézo sossio i fonkssyone. An missouk ! An kassyète !

Dèrnyé nouvèl bann sportif i aporte aèl zot soutien é èl mèm èl i porte plinte kont bann rassis la kritik aèl... In bone réakssion, mé sirtou la vré réponss sar dsi lo tatami é sé la dsi Léa fontène va montre azot son kapassité.

A bon antandèr salu !

Justin