Kan mwin téi sava lékol, mi rapèl bien dsu in klass vint-sink marmaye inn-dé téi pass an sizyème, inn-dé téi pass sèrtifka d’étid, inn-dé té i sava lékol manyèl pou aprann in métyé.. Dopi tan-la lé shoz la fine bien shanjé : lékol lé obligatoir o moins ziska laz sèzan, é aprésa néna in kantité filière pou bande jenn réissi zot formassyon. Poitan néna sak i réissi briyaman, épi sak lé bordé. Néna bande voiyan vèr lé alimé, épi néna galman bande voiyan rouz é opliss i sava opliss bande voiyan rouz lé la mèm é mi panss pa zot i sava disparète sito di, sito fé, arienk avèk in klakman lo doi.

Didier Robert l’anons anou dann télé La Réjyon téi sava done bande jenn lo moiyin réissir lékol. La réjyon la done in lordinatèr bande marmaye i pass an ségonde épi an pliss va mète an plass lékol la dézyème shans. Rézilta : bande voiyan vèr lé la, épi bande voiyan rouj galman. Sak i réissi briyaman i kontinyé réissi briyaman, sak lé bordé lé touzour bordé.

Sé pou sa mi di : alon pa kriye viktoir toutsuite. Lé vré La nouvèl majorité réjyonal i sorte amélyor lo sistèm Didier Robert. I parl pi solman lékipman bande marmaye segonde, i anparl ossi in kontenu pédagjik, in linterkonèkssyon rante bande zamontrèr, bande paran épi bande zélèv. Mé lo fossé sossyal doublé par in fossé la konéssans i sava disparète konmsa. Kansréti in pti pé.

Dopi dé zané é dé zané lékol la fé demoune briyan épi demoune largué. Bande moun-la lé paran zordi briyan par la konéssans pou in pé, largué d’la konéssans pou in pé. Paran diplomé néna, paran ilétré néna galman… zanfan bien suivi épi bien akonpagné néna, zanfan abandoné dann lo suivi lékol néna galman.

Mézami, mi vé pa ète in zoizo d’mové zoguir, mé mi di solman porte atansyon : lédikassyon dé vitèss i fini pa avèk bande bone zintanssyon… A bon ékoutèr, salu.