Sé konmsa k’in zour mwin la rapèl inndé parol séga é zot la pa fé mon bonère. Bande parol lété : « zanfan la pa mwin, mi done pa manzé, mi nouri pa lo vèr pou pik mon kèr ». Sa sé in kozman danzéré, sa i pé fé d’tor déssèrtin marmaye, si wi pran sa promyé dogré. Alor, alon méfyé bande kozman konmsa é anpliss kan zot lé shanté avèk in l’èr antrénan. Si tèlman wi kroi sa i koul de sours.

Mwin lé sirésèrtin zot la antande dan not vi demoune malméné, maltrété par kissoi in pti mère, kissoi in pti mère, viktime linzistiss par raporte zot domi-frère, sansa zot domi-sère Mi koné même bande zistoir lontan i anparl de sa é sa i fini mal an zénéral.

Alor mézami mi panss bande zafèr konmsa i domande anou fé noute révolission intèryèr : pran pa la résponsabilité okipe zanfan si wi san wi gingn pa done ali l’amour épi lo soin li la bézoin. Kalkil bien li lé pti mignon-mignon zordi mé domin li va grandi é li va évolyé é pé s’fère domin, par la fors lé shoze, par l’évolission séparé lé z’in lé zot, wa fé fass in problème difissil é par in sinpe désszion ou lé kapab gate la vi plizyèr pèrsone, aou mèm, zanfan la pa ou, épi son momon.

Zot i koné lédikassion sa sé in n’afèr konpliké, mèm la pa in syanss égzakt. Mi koné bande éspèsyalist la konéssans imène, i éshoué san pour san dann lédikassion zanfan. Pa ké zot lé pli bète ké mwin, ké ou, ké l’ote, mé pars sa sé d’moune é demoune lé konpliké. Défoi par azar wi réissi fé lédikassion kélk’in, é tanmyé, défoi i foir konplètman.

Zour-la wi di, plito ké désside okipe lédikassion in moune zour-la ou nora myé fé kass oute bra. Konmsa ou nora pa été dan lo ka. Mé si oute métyé sé sa, ébin fo fère ali lo myé k’i pé é sirtou doné sak ou néna pou doné, done l’amour, done lo soin, done bande zidé klère é bande zidé just. Alé ! ni artrouv.