Nout tout i koné kozman-la é pa arienk zordi sanm pou moin. Zot i koné fèye sonz ? Sa lé konm vèrni par dsi, é li pran pa d’lo-li mouye pa si zot i vé. Sa lé vré pou fèye sonz konm pou in bonpé fèye bann plant sak lé gra. Sans prop ? Nout tout i konpran é la pa bézoin pass bak plis vinn-troi pou konprann in n’afèr konmsa. Astèr lo sans figiré : sa i vo pou demoun i lèss pa zot inprésyoné kisoi par in konpliman, kisoi par in kritikasyon. Lé konmsi li s’anfoutsa. Normal : la bav krapo i toush pa in fémèl pijon ! Ni pé di ankor : konm lo dsi plime kanar é sé topète morète. Alé ! Mi lèss azot rofléshi la dsi é ni artrouv pli d’van. Sipétadyé !