Lékol èpi la vi lé pa parèye inn avèk l’ot. Dizon, lékol ou néna dovoir épi loson. Bann késtyon i poz aou, an prinsip néna lo répons dann programm ou la fine fé. Lé posib ou i gingn légzamin, lé posib ou i gingn pa li é dann in ka konm dann l’ot ou néna loson pou tiré. Konm par ébzanp : moin la travaye konm k’i fo, sansa moin la pa travaye konm k’i fo ? In laksidan i pé pa prévoir, sansa in mank préparasyon ? Pétète moin la pass sa konm in lète la post-in pasaz a la vèv in pé i apèl sa. Sak i gingn i konpran ! Dan la vi légzamin i ariv san k’ou la gingn lo tan pou réviz in program ninport ékèl. San k’ou i atann i fo ou i rant dann ron é pé sfèr ou i ansort aou bien konm pa. Ala pou kosa, d’apré moin, in problèm la vi lé pa in n’afèr ou i pé règ vite fé, bien fé konm in pé I di sa. Alé ! Mi kite azot rofléshi la dsi é ni rotrouv pli d’van. Sipétadyé.