Mézami, la rantré lékol la fine fé dopi lindi. Pou la Rényon sa sé in gran nouvèl i intérèss sirman plizyèr santène milyé d’moune : la kominoté skolère dabor, mé pa solman. Si ni kalkil bien, mèm sak lé an déor la kominoté skolère, zot ossi lé intérèssé : in gran nouvèl ékonomik, in gran nouvèl sosyal, in gran nouvèl kiltirèl.

Ni fé po nèv konm koulèv apré in gran somèye. La vi i ropran son kour...

Lékol, mézami, sa sé in gran zafèr pou in péi, pars si ni kalkil bien la poin in gran nouvèl konm lo partaz la konéssanss rante lé z’inn é lé z’ote, rante zénérassion, rante proféssionnèl, rante lo moune an zénéral... Zot i koné, la plipar bande produi, ni vé ni vé pa, kan inn i anrishi, in n’ote i apovri sansa son bien i transform dann in n’ote bien. La konéssans la pa in kapital ordinère : kan wi partaze wi garde oute kapital, é myé ké sa wi goumanta a l’éshanj. L’amontrèr i anrishi lo kapital l’amontré, mé l’amontré li ossi i anrishi lo kapital l’amontrèr.

In bon journé sé kan lo zélèv la goumante son kapital konéssanss an kantité épi an kalité, mé sé kan l’amontrèr li ossi la vni pli rish a l’éshanj.

Lo moune blazé pétète va di, kossa Justin l’apré raminn sa frèze dann in n’afèr konmsa, li k’i sava pi lékol dopi si tèlman lontan. A ! Si li lété lo pov amontrèr bande marmaye noré fatig lo tété toute in gran zourné, kossa li noré di ? D’ote an kontrèr va di, si Justin lété so pov zélèv lo mètr la fine soul ali matin o soir, kossa li noré di ?

Ala sak mwin noré di : mwin noré di konmsa lédikassion, la konkète bande konéssanss mi trouv sa in privilèj dann in sosyété kissoi la n’ote, kissoi d’ote, kissoi la grande sosyété imanité... Dann toute séréal néna la paye, mé néna lo grin galman é si ni vé ramass in kékshoz pozitif d’in zourné lékol sé dir : solèye i lèv, solèye i koush, noute kapital konéssans la ankor goumanté an kantité, mé galman ankalité. Sé lokazyon d’avanssé antouléka.