Pou kossasa ?

Pars opliss la vi lé sovaz, opliss ou néna lo droi pass par santyé pou sorte d’in androi alé dan l’ote-konm in pé i di, ou lé pa défandi pass par shomin d’travèrs. An kontrèr,opliss la vi lé modèrn opliss èl lé ankadré, règlomanté, opliss ou néna konm l’inprèssion oute libèrté lé anbaré in pé toute koté.

Biensir toussala i done anou l’okazyon rofléshir dsu noute kapassité pou agrandi osinonsa non noute léspass libèrté ...I sifi ké mi di azot sak mi di pou rapèl in zistoir in vyé moune la rakonte amwin. Zistoir-la mi pé apèl ali : « Lékol manké ?Assiz dsi pti ban ! ».

Fitintan, figuir azot, marmaye téi sorte Boi d’nèf Sin-Dni pou alé lékol Sint-klotide é konm téi rante sinkan lékol zot i konpran lo traka bande pti-janb sinkan pou sorte la kaz épi pou alé lékol-kan anpliss ké sa, i fo armonte lo soir... Donk dann tan-la bande marmaye l’ékol téi marsh an groupe é téi ariv l’èr k’téi ariv... Défoi an rotar, mé ké voulé-vou ?

Si zot téi marsh an groupe lété pars l’avé lo shien dann shomin épi sirtou in bande zoi é zoi-la sa lé térib pou fé pèr marmaye.

Lo téknik té sinp : kan bande marmaye i ariv landroi néna zoi, zot ménass travèrssé. Kan lo zoi i fons dsi zot in bande marmaye i travèrs l’ote koté.Kan lo zoi i artourne l’ote koté pou kapaye bande marmaye, in ote groupe i travèrs. Inssi d’suite, inssi d’suite, ziskatan toute bande marmaye la fine travèrssé é lo zoi, son kouyon la kass par boute. Sa lété kan lo téknik téi marsh bien mé néna dé zour inn-dé marmaye té an rotar é l’èr-la pa d’moiyin pou passé zot lé blijé bash lékol épi artourn zot kaz.

Donk in zour Féliss l’été an rotar é kan li la sèye passé la bande zoi la kal ali é li té oblizé romonte son kaz .

Son papa i domande ali : « Féliss i sava pa lékol zordi ? » Li réponde : « Papa mon vante i fé mal » .Son papa la mète ali assiz dsu in pti ban é la di ali kan lo vante i fé mal, i assiz dsu ti-ban. . Féliss la konprande li téi sava pass in mové zourné é li di : « Papa, mon vante i fé pi mal, mi sava l’ékol ! » Mé son papa la di : mal o vante i guéri pa konmsa sa, i fo rèss assiz toute la zourné.

Li la bien éssèye triké mé arien a fèr pou tronpe lo vyé é sé konmsa ké li la rèst assiz in gran zourné dopi gran matin ziska lo soir. Aprésa li la di dann son kèr : domin mi sava lékol ! sof galé, sof doboi, mé m’a vnir abou mète bande zoi a la rézon. Mé pli préférab li lèv bonèr é sé sak li la fé. L’inyon fé la forss zot i kroi pa ?

A bon antandèr, salu.