Témoignages : Sak ou i di lé danzéré pars moin la mèm antann demou n di sak i koz é pli pir sak i ékri dann kréol rényoné sé in bann intégris zot i vé mète lé zot déor pou ropliy azot di zot mèm.

Justin : oté ! La lé sèryé di in n’afèr konmsa. Moin sré tanté pou dir la pèrsone la di sa, trap dé pti boi épi zoué dann sak zot i koné. Mé sèryèzman pars moin lé sèryé kan mi di sa : mi di néna in lang kréol La Rényon, na poin lion pou anpèsh rantré é sak i vé si li koné pa li aprann é li va konète. Trèzan d’ran moin lété linivèrsité é moin l’amontr kréol in pé tout nasyon é afors aprann in pé la konète é napoin pèrsone la tap azot. Sèryèzman, shak lang i rouv la port dési in mond : la lang fransé i rouv la port dsi lo mond fransé an plis ké la konésans inivèrsèl, parèy pou la lang bann zanglé é pou tout lang lé konmsa. La lang kréol rényoné i rouv la port dsi lo mond rényoné épi dsi la konésans inivèrsèl. Na poin lintégris la dan é la pa pou anfèrmé mé pou rouvrir.

Témoignages : Si konm ou i di, si shak lang i rouv la port dsi in mond é anplis dsi la kiltir inivèrsèl, mi yèmré savoir si ou i pans kréol rényoné i pé rouv galman dsi la port lo mond kréol rényoné épi dsi lé z’ot mond donk dsi la konésans inivèrsèl.

Justin : A ! in bon késtyon sa mon fra ! Mi pé réponn aou par oui, konmsa nou la fé lo tour d’la késtyon mé sré pa sifizan kant mèm. La port k’i rouv dsi lo mond kréol rényoné, mi pans konm moin ou i konpran kosa sa i vé dir. Kan ou i rouv la port, si ou i vé, é si demoun i gide aou, tout lo mond kréol rényoné lé la dovan ou, a out porté mé ou i doute bien i trap pa tousala konm la kol i trap zoizo.I fo forsé pou konète, i fo forsé pou aprann é sirtou i fo ou néna lo zoutiy moin la anparl aou talèrla…

Témoignages : Ou i sava dir amoin la lang kréol rényonèz ou la ?

Justin : Mi pé dir aou sa, mé mi pé dir aou sa si ou i vé in rouvèrtir dirèk dsi lo mond kréol rényoné. Si ou i rode la fasilité ou i fé konm moin. Astèr si ou i vé in laksé indirèk avèk out lang aou lé posib osi : kisa la di sa la pa posib ? Moin la zamé antann dir in n’afèr konmsa… Mé si ou i koné pa la lang pé sfèr i rèss aou touzour in zone lobskirité dann out konésans . Konm moin si avèk mon kréol rényoné mi vé rouvèr la port in n’ot kiltir. Lé riskab sar difisil pou moin. Otroman mi pass par la port la konésans lé z’ot mond, sak mi apèl la konésans inivèrsèl é mi kontant amoin sak mon la gingn konprann é si mi mète in bonpé d’tan, sé mon n’afèr.