Témoignages : Bin bann marmaye kan i sava lékol é sak la fine sort lékol koman i fé ?

Justin : Mi pé dir aou ou i soulèv in késtyon lé dir trouv la répons ou la ! Ptète pou sa i diré lékol lé in pé an fayite avèk in bann zélèv i réisi bien épi in bann i sort lékol san gingn in diplôme sansa in métyé. Sé pou sa, shak ané i sava mézir lo nonm zilétré épi i trouv touzour plis san mil-san sèz mil d’apré in dèrnyé lan kète-Poitan néna lékol pli k’i an fo, amontrèr i mank pa nou, nou néna liv, lordinatèr é tout lo tranbléman mé rézilta : lékol lé an kriz, touzour an kriz é la pa arienk yèr sa la koma nsé.

Témoignages : Di pa moin sé la lang kréol rényonèz l’otèr, non pli k labsans la lang kréol dann program lékol ! I di pa néna mèm lékol biling koméla ? Koméla néna capes kréol é a partir d’lané k’i vien nora mèm lagrégasyon la lang kréol…

Justin : Mi éspèr ou i sava pa dir bann marmaye La Rényon lé boushé a l’èmri kant mèm ? Pars sanm pou moin kan i anparl sa, mi mazine an zénéral sé lo sistèm lé mal roganizé pou bann zélèv. Sé la mashine k’i konvien pa é sanm pou moin sa sé in problèm lé dir pou réglé. An touléka sète la lé pa tro valab pars si li lété valab nou noré vi bann progré é malorèzman ni oi pa .L’èrla, mi di akoz i done pa nout lang kréol la plas i rovien ali d’droi dann l’ansègnman ?. Mé par l’fète si lékonomi lé néokoonyal, si la sosyété lé néokolonyal, akoz i di pa lékol osi lé konmsa épi ansort anou dann in n’afèr konmsa.