I paré in lansien onm d’éta-Clémenceau mi pans-téi di l’armé sé in n’afèr tro sèryé pou konfyé sa bann militèr, ni pé di osi : lédikasyon bann marmaye sa lé tro sèryé pou konfyé sa lédikasyon nasyonal. Sé pou farsé zot i konpran é pa pliské pou sa !

Témoignages  : I prétan dir la lang kréol rényoné lé an voi pou disparète. Ou i kroi sa, ou i kroi pa ? Ou i pans pa i fodré inskrir ali par l’unesco konm kékshoz an voi d’disparisyon ?

Justin  : L’UNESCO néna d’ot sha pou fouété. Antansyon néna vréman désèrtènn lang apré disparète mé la pa nout kréol rényoné. Si ou i baz d’apré bann zankète néna kant mèm plis katrovin pour san demoun isi La Rényon i koz kréol, i konpran kréol, i manyé la konésans an kréol-dizon i mank zis done la konésans téknik la lang é sa sé pal o pli dir. Alor si i désid fé, mi oi pa pou kosa i gingn ar pa.

Témoignages  : Bin Justin kozé lé bonmé azir lé myé é si ou i vé zazir kosa ké ou i fré ? San tardé !

Justin : In propozisyon solman ? Pa pou lékol pars moin la fine di si i fé pa lékol an kréol rényoné-pou sak i koné bien koz solman kréol rényoné - lé shoz va rèss konmsa avèk siksé pou in pé échèk pou lé zot. Si sa i kontraye azot ébin fé in l’ansègnman biling dopi pti kass ziska bak. In propozisyon épi pou tir bann konsékans apré : mète kréol rényoné konm dézyèm lang ofisyèl isi La Rényon, égal égal avèk fransé. Mi oi sa lé bon moin sa !