Yèr kan moin la fé mon modékri, moin té i vé mète « a suiv » mé moin la pa mète. Moin té i rogrète in pé, mé mi pans bann léktèr fidèl va konpran bitanblan, sak moin la ékri yèr épi sak zordi lé dann la suit lozik, in-a-l’ot. Pou kosa mi di sa ?

Si zot la lir nout zournal zot la sirman vi Paul Vergès apré romète lo rapor l’onerc la minis Ségolène Royal, pars nout kamarad lé prézidan l’onerc dopi kék z’ané é sé li-mèm la bate tanbour dsi lo réshofman klimatik é dsi bann mézir i fo prann pou sèy anpèsh nout klima sir-shofé… Sa i tonm bien pars lo nouvo rapor i apèl zistoman : « L’arb épi la foré a l’éprèv dann in klima shanjé ».
L’èr-la mi rapèl Paul Vergès la fé plant sink san mil pyé d’boi dann la vil Lo Por. Li la fé plant sink san mil dann bordaj la rout Tamarin ; li la fé dévlop léstrésité épi lo shof lo solèr dann La Rényon. Li la fé in plan pou l’otonomi dann l’énèrji. Li l’avé in projé lo trin pou marsh avèk l’éstrésité. Kisa la défann bannzil plate pliské li ? kisa plis ké li la tir signal d’alarm kont l’éshofman klimatik ?

Mi arète la épi mi di, sa in kominis mé kisa lé pli ékolozis ké li La Rényon. Lèv lo doi sak i kroi li sé lo shèf lékoloji isi shé nou ! Lèv lo doi, mé kroi pa nou va kroir ali !
Mi pans pa sa i oi vréman dann la pratik désèrtin. Lékolozis avèk la boush, sa i mank pa sa isi ! lo vré lé rar konm korn lapin.