Dézà lariv justin lo zistwar lo kok manzé par lo papang déé(2) foi, pa lo minm kok, inn aprè lot ! Zordi dézinm bouk i krèv pars li la manz granilé ou grin mai é li navé poin asé d lo po li boir ! Ma ekspliké : mi asèt ek in kamarad in bouk 500 éro na a pé pré dé zan, po mèt ék mon sèv ; mi amar a li ék in pié kèr d bèf, mi donn a li rabato po kabri, pétèt in pé tro… li ariv pa ék lo kivèt lo, mi sar bat karé, mi arviin, mi dor ; landomin ma voizine i di a moin : "oté, dan la nuit ni antan out sèv la i kri, so matin nou lèv ni voi ton bouk la i bouz pi, sa lé mor !"

A moin, sé rouv son vant (po fé lotopsi) -plis a li, mon kamarad i di a moin, sa la pa malad, mét dann konzélatèr- ; zot i koné son pans té plin konm gro soso mai ; mi té trouv drol, mi voi pi son krot ; mi di sa lé bizar, mon bouk i kaka pi ? Li la fé in loklizion son tib dizestif ; si manzé i dsann pi, na pi dizestyon, absorpsyon intestinal ; brèf, lo vitamin, glusid, lipid, protéin i pas pi dan son san, li mor, li mor la soif, li mor la fin tout ; a moin lotèr : a moin son vétérinèr !

Zordi, zot i koné koué ? Inn ti bouk 4 moi, lé né dan mon park ; tou blan. A la mi vé tiré èk la monmon po armèt a èl ék in not bouk ; sad la moin la pèy 400 éro-mi pé pa mèt la fi él son papa ; i fé linsest - mi voi lo ti bouk i mégri ; mi koz sa èk domoun : i dia moin i fo pirzé ; sa i vann 19éro é kèk, inn ti sring ; bann zélvèr ékpérimanté i présiz a ou, pirz tout lélvaz ; pirz i tié lo vèr.Bon, mi fé tèl lo véto, i di a moin… Li di a moin observ 8 zour, si i mars pa aminn dan son kabiné. Oté, 8 zour ? Mi di si li na frè, ma garanti ; donn do lo ; mi ogard in moman mi voi li rumine ; a mi di, lé bon la santé i arviin. Non, moin lé trakasé ; mi voi pa la form arnnir !

4 zour, in matin, ti bouk la, rèd : li la dormi ; li lé mor dan son someyi ! Bon, pèrd pa la kart ! Otopsi ! Li lé pa mor ék lo ver ; li lé mor ék son léstoma plin soso granulé ; koman ti vé viv si ti boi pa dlo ! So kou si li lavé son lo ; té li minm ki vé pa boir ? Pét sépar i li, mèt a li tou sèl, sé in stres tro for po so bann ti zanimo ; lès a zot ék zot monmon lo pli tar posib ? Léspèrians in nafèr i fo rokomans plizièr foi po la loson i rantr dan nout tèt ?!

 Justin