Nou la pi bézoin lénèrzi éolyène. Nou la pi bézoin non pli lénèrzi fotovoltaïk. Ni sava pi dann rin volkan pou bransh nout priz kouran. Tirbine dann fon loséan, nou la anvoy sa dann la Martinik, pars nou la pi bézoin léspérimantasyon. Nou va kontante anou avèk pétrol épi sharbon, épi lo gaz la foré dépi lontan lé antéré vivan. Nou va kontant anou avèk sa é pou bien romèrsyé anou, bann majistra pétrol va avans in bon moné nout bann gran mazistra. Ala koman, ni kont an avoir vintan an rotar olèrk vintan d’avans déssi la késtyonn lénèrzi ronuvlab, konm banna té i done anou, na poin si tèlman lontan. Sarko si li lé ankor la, sar kontan pou vréman avèk nou.

Sa sé pou komansé, pars konm ki diré nou la pa tyé kouyon pou pran son plas é ni koné bien pétrol li, sharbon li, lo gaz li, tousala demoun va trouv zot bout san tardé. Ni koné bien sa la poin pou lontan, ni koné nora demoins-an-moins. Alors, d’apré zot, nou va artoun dann tan la bouzi, dann tan demoun téi dor konm poul épi téi lèv avèk bardzour l’èr kok i shant ? D’apré zot, sé sa nout l’anbisyon, sé sa ni vé pou nou, pou nout péi é pou lo mond antyé,..é-bin non !

Nout nouvo l’anvi, nout nouvo l’anbisyon, sé lénèrzi nikléèr. L’énèrzi nikléèr ? Oui, mon bann dalon. pa ninport lakèl, mé sak i sort dann bann mikro santral nikléèr. Aréva, ni ème aou ! EDF ni koné bien vi pans anou ! Ni koné,dann zot kartron, zot nana in prozé mini-santral nikléèr pou aplik dann bann péi l’outre-mèr, épi dann toute bann zil. Inn solman i sifi pou done kouran in milyon dmoun. Sa i apèl lénèrzi prop ! Mé kan v’ariv in sounami, in tranblomann tèr, bann ponpyé di syèl va sort La France épi va vni sov anou. Pars, moin la obli dir azot so bann mini santral-la, sa i koul dan la mèr. Sa i pran pa bonpé la plas, é si nana ankor poisson dann fon l’oséan ni koné pa, tanpir,provik mini-sanral nikléèr i done anou kouran an kantité, i klimatiz La Rényon. L’énèrzi nikléèr sar nout nouvo bondyé !

Justin

NB : Sansa pou kossa nou la arète la jéotèrmi, nou la arète bann lékspéryans déssi lénèrzi la mèr, nou la koul lo prozé Gerri. Si la pa pou sa, mi oi pa pou koué alor !