Mi sort lir Nicolas Sarkozy i sava bate déor in sèrtin madam Lauvergeon. Madam-la i tonm lo gran shèf dan la sosyété Areva, pli gran sosyété mondyal pou lénèrzi nikléèr. Konm lé dé la pa mon kamarad, konm di lo kont, zot na ka débarbote rantre zot. Mé sa i rapèl anou l’Etat, a travèr son bann sosyété piblik, sé lo pli gran laksyonèr dan Areva : par-la katrovin sète pour san son kapital. Donk, lo gran résponsab lo fanaz bann santral nikléèr dési la tèr.
Dizon lé shoz té i sava a popré bien pou so gran sosyété kapitalis d’Etat. A popré bien vi ké toute kalité péi té i vé zot santral nikléèr an aplikan lo provèrb : "apré moin lo déliz !".
Mé solman, la kord i pète koté li lé fay : bann l’izine i komans viéyi in pé partou. Pou fèr lé pli fasil ké pou défèr ! Pou monté lé pli fasil ké pou démonté ! Apré sa, ousa i sa mète tout so bann déshé ? Pèrsone i koné pa bien o-zist... Tout té i sava a popré bien : Tchernobyl té près oublyé, kan toudinkou la katastrof dann Fukushima dann Japon l’arivé... mi pans zot tout la antann parlé, vi k’la pankor fini. Zournal èk télé i anparl pi, sé tou. Mé sa lété asé pou fé déside l’Allemagne pou abandone l’énèrzi nikléèr. La Suisse la fé parèy ; Bann z’Italien la rozète in référandome pou ardonn favèr l’énèrzi nikléèr. Japon i komans bate aryèr. Bann gran péi i baz plizanplis dési lénèrzi dirab : lo van, la mèr, solèy, lénèrzi volkan, insi d’suit-insi d’suit.
Donk, sanm pou moin, la France sré bien konséyé pou arète firamézir avèk so lénèrzi-la, pars san tardé, in bonpé péi lé riskab pi vouloir ni son l’izine, ni son kouran. Li pé ète tèt dir, mé mèm in tète dir i pète an morso dann mir galé blé la réalité.

NB : L’èr-la, kosa i vo bann pti guiguine santral nikléèr sou la mèr Aréva i vé fé ? I sar gingn larzan èk sa ? Sansa l’Etat fransé i sava déside mète larzan la-dan pou pa k’son sosyété Areva i kalbite. Pétète talèr va komans mète so bann ti santral nikléèr in pé partou dan bann péi l’Outre-mèr, konm moin la fine antann dir, alor ké nou la pa bézoin sa pou trap nout l’otonomi énèrzétik épi avans dan la voi nout dévlopman.

 Justin