Ni pé dir — pa arienk so foi issi — mé so foi issi lé bien vizib, noute péi épi noute pèp la ranporte konm in gran révolission kiltirèl. Ni pé dir noute pèp la gingn noute paryaz dsi la kète pou noute lidantité. I fo dir sa i fé lontan i amenn in konba konmsa é lo promyé dépar lété lo kongré noute parti l’ané 1959. Sé zour-la k’la poz lo bann baz noute lidantité é la dsi la konstrui in pép l’i rokoné ali konm in pép.

Avèk son kiltir, avèk son lang, avèk lo dévlopman la konssyans noute lidantité.

Lé vré sak mi ékri la lé pa touzour in flèv trankil. Lé vré nou na linpréssion défoi i avanss épi dé foi i rokil. Mé dann la diré ni pé dir la avanssé. Konm touzour sa i komanss par in minorité ki pran konssyanss mé firamézir sé la majorité i rozoin lo kan lidantité épi la kiltir rényonèz. Lo konba pou la lang épi son bann rézilta lé la pou bien amontre anou lo shomin nou la fine fé dopi pliss soissantan.

Mé astèr ké lo konba kiltirèl lé fine bien avanssé, konm lo konba sossyal, kansa lo konba politik li ossi va dékolé… Ni atann é ni oi pa arivé. Poitan dann fon noute kèr ni panss nou la bézoin d’in révolission politik mé la plipar rante nou i mète la tète sou la zél kan i anparl sa… Sansa i anparl in révolission ékonomik é i konsidèr sa lé bien nésséssèr mé i évite anparl lo bann moiyin politik nou la bézoin pou gingn trape noute dévlopman.

Koméla néna in formul é sa i rézone bien dann noute tète, é ni panss par la forss dé shoz ni tarde ar pa pou oir ali arivé. Ni vé in plan d’dévlopman fé pou bann rényoné par bann rényoné é pou sa la diskission rante toute fors viv lo pèp rényoné. La lojik mèm épi lo réalism i vé sa mé shakinn i kontinyé ral son koté é sa i pé pa marshé.

Alor, « que faire ? » konm Lénine noré di. A bon antandèr salu !

Justin