Travayèr batiman, transportèr, plantèr, zanploi-zèn, èd-édikatèr..., la
kolèr i gonfle partou. La pa in mouvman protèstasion dann vid : dopi 10 zour lo zafèr i dir. Initil di azot, nout péi i artrouv ali pri komm dann in kol zak soso !
Byinsir, dann le sitiasion difisil ni koné, tousala nana rézon batay pou défann son lintéré byin konpri. Sétaki pou rod in travay, dot pou gard zot travay, dot ankor pou amélior zot boushé manzé.
Sélman, si ni vé avansé, i fo pa ni tir dann toute dirèksion an mèm tan. Na
fini par démantibil anou, é La Rénion avèk...!
Lèr larivé pou voir kosa, dann in promié tan, ni pé règ antronou é, dann in dozièm tan, koman ni pé argroup pou règ - èk lo bann vré rèsponsab - sat i
dépan pa d’nou.
Rotromandi, lèr larivé pou kozé, pou dialogé, pou voir koman ni avans
toute Rénioné ansanm, san lèss lo pli fèb atèr. An Rénioné lib, rèsponsab é solidèr, évidaman...!

Justin