Dann la kanpagn pou zéléksyon, in pé la bate déssi program Lalians konm k’i diré la bate déssi bal mayi. Toute sak la fé, té pa bon. Toute sak té dévé fèr té mové. Momandoné, té a d’mandé si banna té i vé pa kass toute : démonte la route tamarin boute par boute, kass lo karante lissé la Réjyon la fé, armète maloya dann fénoir, étsétéri, étsétéra la ké lo ra. Nitil dir bann télé, konm dann bann zournal la droite la doné ossi é pa riyink pou fé sanblan.
Zot té i kroi program Bogoss promyé lété bon ? Sansa sète lo blé-blan-roz Sint-Roz ? Mi koné pa, mé zot lobjèktif té pa la... té i falé solman dégome Lalians. Arzoute ankor bann bataye moustik pou fé lo ta par déyèr. Sak l’arivé, l’arivé. Bon pou sa mèm ! Sirtou k’an plis ké sa, in pé la pèrde la parol, zot lété konmù martin ki kouzi... Zot té i fé lo vif pou kritik Konsèy réjyonal kan Paul Vergès té prézidan, mé zot la pa anparl lo program danzéré létoil-di-sid l’avé fagote avèk bann konséyé té i sort Paris é avansa par sénatèr la lézine.
Zordi in pé i lèv apré in mové somèy, trakassé par in bann mové rèv. Zot i ésplègn shomaz i gonf, la mizèr i monte déssi bann Rényoné konm karapate déssi tété bèf mèg. Mé solman, mi koné pa si mi tronp, mi antann pa zot dénons bann barbar démolissèr. Sré t’i ké zot la pankor byin konprann ? Zot i san pa la korde lé dann nout kou é in pé l’apré aral déssi pou séré mèm ?
Mi pans ké non, pars “si lérèr lé imène, rèss dan l’érèr sé vann son am grandyab”*.

 Justin 

* Errare humanum est, sed perseverare diabolicum (É ! Mi vann konm moin l’ashté !)