Lé vré, nou la fine byin avansé. Lé vré, dépi in bon koup de tan, nou la anbèk dann santyé dévlopman dirab...
Ni pé dir galman, bann dirizan la fine done anou in bon diréksyon. Kan ni gard nout péi ousa lé randi, ni pé z’ète in pé kontan, mèm ni pé z’ète fyèr... San pass la pintir, ni pé dir daoir in péi doi mazine i soré bon marsh èk nou la min dan la min.

Solman, nout kèr par plas i singn, pars la pa toulmoun i bénéfisyé lo progré dann l’égalité konm k’i fodré... Kan ni rouv byin gran nout zyé, ni an apèrsoi tout sak i klosh pa dann nout péi, è mi pans zot sar dakor avèk moin. Touléka, tout partizan l’égalité sar d’akor èk moin... pou oir sak mi oi, pou argrète sak mi argrète, pou souète sak mi souète.

Kan shakinn nora son par dann dévlopman dirab, kan shakinn léspri sar dan la limyèr, kan nou sar fine nyabou kine la mizèr noir, kine léshèk skolèr, avèk lo méyèr vi k’i fo pou lé z’inn é pou lé z’ot, kan nou sar fine fé disparète tout sak i tèrni nout vi, rann ali pi dir, rann ali pli mol..., lèrla, mi pans, nou sar kontan viv dann nout péi. Lèrla, pou vréman, nou va trap in lil léksélans. Lèrla, solman !

Justin