Mi rèv mon péi lé fine sapé ek diktatir modérn ; i di a ou démokrasi mé non, moin na linpresyon domoun i désid po moin ; mi vé k mi vé pa, i fé dzafèr la pa bon po mon péi ; toulmoun i wa sa lapa bon ; toulmoun i kri, si la voi piblik, dann zournal, minm si rézo sosio, face book, pas fesse bouc ni fesse chèvre, skype si ti préfèr ; ogard in pé kan toué nora in lokazion, si ou lapoin domann kamarad montr a ou, oua war ; i dialog, i ésanz ; na sak lépour ; sak lé kont ; sak i di nora larzan, sak i di oté mon frèr ou sa i sar trouvé ?

Oui antan konm moin, mantalité i sanz dan tout péi ; zinfo i pas é i ropas ;
Alor, nout prézidan rézion la fine poz son prémiè pièr son nouvèl rout littoral (NRL) ; kosa larivé ? A koz vin désanm ? Fèt réynèz la liberté ? Liberté dakor ; mé pa po fé ninport koué !

Kan mi pans dan 40 tan nou sar pokor fini péyé ! Zot i koné in zénérasyon sé 25 kan ; donk mé zanfan va mor san k lo krédi Didier Robert sra fini réglé ; nana ki di ke nou lé pa bien ranségné… i sifi étal lo krédi. Mé kan toué lé o ki ; ton pos na riink gran trou ; i sap par million ; ou lé konm di kréol konm in panié persé ; koué ti vé péyié ? Ek koué ?

Moin moin na 70 zan ; dan 40 tan, moin nora 110 zan (donk normalman moin la fine ariv koté tanto) mon garson 43 zan nora 83 ; li sar fine vié osi ; sa fi zordi na 14 zan : el va péyé tout sa vi ziska 54 tran, alor kel la zamé domandé in rout si la mèr, in danzé piblik, in pouritir po lanvironman ! Koué riink po dé troi zantropriz BTP ; é ankor, rogard ou i sort lo bann Bouigues, Zeifage, si la poin Dassault ; anfin mi koné pa, mi frékant pa zot !
O ki lé kréol laddan ?
Lès a moin rév in péi rézonab !

Justin