Oté

Lès spa nout lang tonbé pars sé nou nou va lèss tonbé

Justin / 23 octob 2018

JPEG - 43.6 ko

La somenn kréol i ariv é in pti pé partou dann La Rényon-mèm in pé partou dann bannzil kréol-demoun i sava fète z’ot lang kréol é sa sé in n’afèr i fé plézir anou, pars nou osi nou néna in lang kréol é néna i bon pé d’moun dsi la tèr i partaz in lang kréol.

Biensir shak pèp néna son lang : martiniké, la syène ; guadloupéin la syène, lang kréol guyané la syène. Arzout èk sa lo haïsyin, séséloi, rodrigé, épi ankor in takon la lang kréol nou mèm ni konpran in pé mé pas san pour san. Lé ga, ni anparl souvan bann shagosien ébin banna néna z’ot lang shagosienne é sa i zoué in gran rol pou zot tienbo dobout.

Mé la lang pou la lang, sa i ansèrv arien. La lang pou la kominikasyon ok ! La lang pou la kiltir, ok ! La lang pou la vi sosyal, ékonomik ok ! La lang pou la fason pansé, pou la manyèr oir lo mond ok ! Pou filozofé, ok ! Mil foi ! La lang pou shanté, la lang pou di fonnkèr, la lang pou di nout sagrin. La lang pou aprann dé shoz ok ! Pou fé la politik é tout sak i s’ansui. Mi arète tèrla pars la lang sé in kékshoz kapital pou la vi in pèp é sa ni koné bien.

Alé ! Mon bann dalon lèss spa nout lang kréol tonbé, pars sé nou mèm nou va lèss tonbé.