Défoi dann télé, i pass fime déssi la mafia, sansa déssi bann gangstèr la-ba dann l’Amérik. Kan dé gang i sèy mète d’akor déssi in biznès, zot i réinir. Solman, avan k’asir a tab, inn-dé kador i ramas toute lé z’arm banna nana avèk zot. I koné zamé, pars dé foi, konm Likilik, nana in pé i tir pli vit ké zot l’onbraz. Alors, i vo myé ramas lé z’arm plito k’déklansh in fé d’artifis pèrsone i kontrol ar pi.. zot i konpran amoin ?

Koméla, nana bann z’arm danzérab. Mi vé pa anpparl mitrayète ! Mi vé pa non pli anparl gome-kogn ! Mi vé pa non pli anparl la poizon, dann in tan, in pé té i mète dann siro ! Non ! mi vé parl téléfone portab. Sa lé danjéré sa ! Sa la fine vann in pé dmoun san tir ali dann posh. Ou i kroi ou lé bien trankil... ou l’apré fé inn-dé konfidans... san fé antansion ou i pass la lign zone la légalité… défoi la lign rouj. L’èr-la ou na in soidizan bon kamarad i mète an marsh lo rogistrèr, é ou k’i kroi pèrsone i antann pa ou an déor, ou l’apré pran in risk inkroiyab.

Sa la fine éspas in pé partou. Konm zot i koné, sa la spass dann in rényon la komision téknik la Troi-F. Mèm ké in gran l’antrénèr i apèl Laurent Blanc, l’avé poin arien pou fé dann komision-la, la vni di son dé mo. Pétète pou farsé ? Pétète pars li pans vréman sak li di ? Touléka, sak tout la di ansanm lé bien an-nuiyan pou zot, pars lé pa tro loin lo bébète i apèl rasis. Toulfason, kan ou i komans parl la koulèr la po d’moun épi pou kritik azot, ou lé pa tro loin in n’afèr konmsa.

Li la fé dé mo d’éskiz, mé i prétan dir sa té pou anfons ali ankor in pé plis. Zordi, li sava koz dovan in komision. Kosa va fé ? Kosa va di ? L’ékip do Frans va anpèrd son l’antrénèr, sansa i anpèrd arpa. Sa nou va oir ; touléka, mi pans, konm di lo kont, avan kozé, i vo myé tourn sète foi son lang dann son boush... sansa lèss téléfone portab dann véstyèr. Sa lé tro danzéré !

 Justin