An prinsip la plipar d’zafèr i fo ou i fé l’éséyaz. In linz ? I fo ou i ésèye. In soulyé ? I fo ou i éséye. I pare mèm inn-d l’androi fé maryaz a l’ésé. Pason la dsi ! Mé sak mi rapèl bien, pars lé ankor fré dann mon tète, sé in l’éséyaz jingade. In jingade, si zot i koné pa, sé in rado : omoins sink pyès do boi anmaré l’inn avèk l’ot, avèk in pti ban par dsi é in gran golète pou fé avans lo l’ékipaz. Donk, dann la bé Sin-Pol, in bann demoun l’avé fé in jingade, mi pans, pou alé la pèsh. In zour, la mète lo jingade dann lo la mèr é pars lété pa prévi, lo rado la déviré : tète an o, tète an ba, tète an o, tèfte an ba. La fini, droite fishé dan fonn la mèr. Mi rakont pa zot koman lo bann zoiyé konpagnon la soté, kriyé, fé san toush pars mèm in z’afèr sinp i pé réaji in fason ou i atann pa. Alé ! Mi lèss azot rofléshi la dsi é ni artrouv pli d’van sipétadyé.