Moi d’avril 2007 : in pé navé arienk zéléksion dann zot tèt. Mé in pé té i dor pa : zot té i kalkil kèl fason tir dann program lékol zafèr zot i èmp pa. Zot i ansouvien la tir lansègnman bann lang rézional, kréol an parmi, dann lékol primèr. Afors, in pé la rouspété, la fini par armète lo kréol konm li lété lané 2000... Solman nana in n’afèr nou la pa port asé atansion, sé la plas lésklavaz épi la trèt bann noir dann bann program lékol primèr.

Sa lé ékri dan la loi, alor nou nora pi kroir pèrsone i oz ar pa toush in n’afèr konmsa ? Lir la loi Taubira, zot va oir, son lartik dé lé klèr, é pliské, vi k’i di : « Le programme scolaire (...) réservera à la traite négrière et à l’esclavage la place conséquente qu’ils méritent ». Alor, kissa noré pi pans nora trouv in malfondé pou fé sak la fé : i parl ar pi lésklavaz épi la trèt dann lékol primèr...

Sa sé in rashkèr pou nou, é ni pans sa i doi ète galman pou la plipar dmoun dan la Frans épi dann loutrémèr.
Kilé lo passé, kilé nout bann rasine. Sé konm si nou la artourn loin déyèr d’in kou mèm.
I sava tro loin la lé ga : la i fo komans vanjé !

Justin