Médame zé Méssyé, la sossiété koze èk mwin sé koze èk in kouyon mé sé o pyé d’lo mir k’i oi lo vré masson.

Mézami, kozman mwin la mark an-o la sa i sorte in péi mi koné pa lakèl mé mi doi dire azot sa i poze amwin problème. Pou kossa ? Di konm lé di, léspèryanss sé listoir in moune, sé sak la spass dann son passé mé la pa sak va éspass dann l’avnir. Sé l’èr ké sa i bote pa mwin ditou. Biensir, lo passé sé lo passé é kékshoze ou la viv dann lo passé i aport ar pa ou in solission pou l’avnir.

Ala in n’afèr mi kroi pa : biensir sak v’ariv amwin domin é mèm apré demin sar pa parèye san pour san sak mwin la viv dann passé. Pa san pour san, mé pèrsone i di pa mwin sak mwin la viv yèr, sansa avan yèr i pé pa ède amwin fère fass in sityassion v’ariv amwin dann l’avnir. Si mi kalkil bien, sa va rande amwin sèrviss si mi koné tire la losson. Alor, zot i pansspa sa i mérite in roflékssyon. Mwin mi panss i fo rofléshi dsi lo passé é sa i doizède anou pou lo prézan é pou l’avnir a kondission mi fé pa in l’aplikassion mékanik mon léspèryanss.

Alé ! Mi kite azot rofléshi é ni artrouv pli d’van. Sipétadyé !