Léspoir lé mor dsou pyé tamarin ? Mi pans pa

Konm zot i koné, dimansh l’avé zéléksyon. Biensir mi sava pa fé in romark dsi lo rézilta, vi k’mi ékri mon kat ti mo l’èr biro lé apène rouvèr. Bon alor si la pa pou komant lo rézilta, pou fé koué alor ? Mi pouré dir azot pars i fo bien mi fé mon modékri pou zoinal lindi, mé in répons konmsa nora té pa sèryé.

Akoz alor ? Pars ni vé, ni vé pa, in zéléksyon i doi zète réspékté, pars kékpar sé kant mèm la volonté lo pèp mèm si mi trouv volonté-la lé in pé galvodé koméla. Mi antan déza in pé apré di : « Galvodé ? Galvodé ? Ou i di sa pars koméla out parti lé in pé afébli késtyon la kontabilité éléktoral ! ». Non mi di pa sa pou sa.

Dabor si ni lir bien zournal, si ni ékout sak lé z’inn é lé z’ot i di, zidé nout parti lé plis partazé zordi ké li lété néna sink dizan. In prèv si zot i vé : kan nou téi di néna in kasur dann la sosyéé rényonèz, demoun téi réponn an ou nou lé dann in sosyété l’armoni. Kan ni dizé : antansyon sak in pé i apèl lo sosyété d’armoni lé riskab kass par boute.L’èrla, in pé téi di : »sé sak zot i souyète ! » ; Konmsi suivan nout poinn vizé sa sé in n’afèr pou souété… San fé vantar, ni pé dir nout zidé oplis i sava, oplis i nouri l’opinyon piblik.

Konbien foi ni antann : a ! zot l’avé bien rézon ! Anpliskésa, mèm bann kont-parti i rokoné an dsou nou l’avé rézon. Konm bann abolisyonis avan l’abné 1848 l’avé rézon. Konm bann partizan l’égalité sosyal l’avé rézon. Konm bann partizan la défans nout kréol rényoné l’avé rézon é néna rézon ankor zordi. Konm bann défansèr maloya, konm bann partizan la résponsabilité pou nout péi é pou nout pèp zordi néna rézon. Donk si nout parti lé dann kan sak néna rézon ni pé dir li lé rish bann promès pou l’avnir.

Lé vré la pa pars ou néna rézon ké lé shoz i sava vite. Zot i pran souvan dé foi z’ot tan mèm in bonpé d’tan mé zot i avans pti pa pti pa n’arivé. Donk pou sak i priyèr pou la fin nout parti mi di azot zot l’apré koup do lo kou d’zépé é la pa an téléfonan inn él’ot an misouk zot va gingn rézon kont nou. Dizon pou zot l’éspoir lé mor d’sou pyé tamarin.