Moin na konm linpréssyon léspri bann politik — déssèrtin byin sir — lé pa tro klèr. Pou moin, lé in pé anbrouyé dann zot manyèr oir lé shoz : zot i di blan épi zot i fé noir, sansa zot i di noir épi zot i fé blan. Alé, alon koz in pé don… !

Konbyin foi zot la fine antann dir gouvèrnman la Frans i konpran pa byin nout sityasyon, é souvan-dé foi, sa lé vré pou vréman. Sansa, zot i di ossi gouvèrnman la Frans i oi anou èk son linète-de-Frans é sa lé vré ossi ; pa toultan, mé kant minm in pé tro souvan...

Ni antan dir bann moun étranj i konpran pa nou byin, pars inn-dé foi zot i fé konmsi sé zot na la vérité, é nou, nou lé dan lérèr. Myé k’sa, in pé i mazine La Rényon té i égzis pa avan zot la poz z’ot pyé Gillot. Bon, sé sak demoun i di, bann politik an parmi… !

Bin alors, akoz kan nana in zéléksyon, in bann i sava rode lèr la-ba dann biro bann parti politik la Frans ? I prétan minm sé bann parti-la i di kissa i doi port dann loutre-mer. Alors, lé forsé, dispite i pète dann park kanar, vik la pa bann parti loutremèr la shoizi bann kandida k’i fo azot !
Konm in pé i di : la pa fé in shoi "endogène". Léspri kolonyal-la, sa i anklav ankor byin la tète in pé !

Justin