Donk si sak lé an franss i koné lo bande téknik pou la lite, otan sé zot k’i vien pou amontr bande rényoné koman i fé pou lité, tanmyé. Konmsa zot va form bande prodiktèr épi bande téknissien rényoné.

Mwin lété si tèlman sir d’sa ké kan la komanss bril bande rush, la shoze amwin in pé, mé an mèm tan mwin la di dann mon kèr : « Pétète banna i koné é zot lé bien kourazé pou aplik in téknik konmsa. » ?Pou mon par mwin la panss sré pli valab si néna in téknik pli an doussèr pou lite konte bande zinsèkt-la. La pa anpèsh amwin konsidèr banna konm in bande barbar san panssé anpliské sa, zot lé ignoran .

Astèr kossa mi aprande ? Mi aprande banna an franss ,dann bande rushé, i koné pa ditou lite kont lo koléoptèr pars na poin sa laba é si napoin sa laba, lé sir é sèrtin zot i koné pa lo bon téknik é zot téknik griyade moush-a-myèl la pa in téknik éfikass, lapa in téknik pou débarrass anou bande koléoptèr-la.

Zordi mi lir in kozman lo prézidan la CGPER, i domande k’i form bande téknissien agrikol rényoné po u lite kont la pèst-la plito ké fé vnir in kantité téknissien déor pou amène la lite shé nou alé oir zot mèm zot i koné pa arien dann domène-la. Zot i koné pa arien mé zot lé a toupé, é konm zot lé a toupé, sa i déranj pa zot pou fé in kékshoz konmsa

Nou ossi ni koné pa, mé ni pé aprann é avèk ki ?avèk demoune i koné amenn la lite kont bande bébète-la, pars néna bébète-la shé zot. Mé an frannss napoin ! alor la pa banna va amontr anou koman i fé. arzoute èk sa si zot i vien, zot va vni par paire, épi zot va pran dë zanploi k’i mank bokou shé nou.

Souvan dé foi sa lé konmsa kan oute nonbri lé antéré déor.Léspri kolonyal sé léspri kolonyal é sa i pas spa zamé..A bon ékoutèr,salu !