(page 16)

Kosa l’ariv mon péi ? Par ékèl larlik nou la palank dann la violans koma ? Dann tan moin la énèt, té pa komsa di-tou. Zordi, lé komsi tout bann kanyar la sort dann gafourn. La Rényon la kal son lèr desi lèr la Bronx, ousansa desi sat Paris laba. Na in pé i di : "tousa sé la fot bann zé lélèktronik, dési lordinatèr, Zétéa sépakwé". Ala dawar sak i apèl la modèrnité !

Rann azot kont ! in bann marmay Sin-Bénoi la parti ral la gèr dési Tanpon, an plis zis pou in linète. Marmay i gingn pa voir, kosa ! Zot la rant dan la kaz demoun po fout le souk, kas tout. Moman-là la gingn la krintiv, son marmay ansanm. Na de koi !
Zordi, marmay ravazèr lé anzolé. La pa di va rézoud tout !

Kosa i fo fé don ! Amar tout ? Anvoy tout se bann siflèr koudpoin déyèr baro ? Ousansa, kalkil in bon nafèr i valoriz zenès-là ? Lé vré, olèr-k batay ant zot, odrémié bann zèn-là i done azot la min, i fé lalianss ansanm pou ésèy avans pli loin, fagot in lavnir.
Amoin, Zistin, moin na rienk in nafèr pou di : "marmay, lèss pa la violanss sort dann fénoir. Batay plito pou zot lavnir, épisa pou sat zot marmay".

Zistin