L’èr-la mwin lé a domandé pou kossa i anvoye noute bande moune la gingn zot diplom proféssèr laba dan La franss : pou aprande kossa ? Pou aprande vnir amontrèr-mol ? Pou amenn in vi d’amontrèr lo ta ? Lèss amwin dir azot mézami sa la pa in bon lobjèktif… Lé vré lédikassion nassyonal mi panss i prann azot pou lo nek plus ultra dann lédikassyon, mé lé pa ditou sa kan wi agarde in konparézon rante bande sistèm édikatif.

Lédikassyon nassyonal dan La franss èl lé inégalitèr. Sé sa ni sava aprannn laba ? Lédikassion bande zadilt lé néglizé. Sé sa ni vé alé aprande ? Kan wi rogarde linformatik néna pliss sinkante pour san dmoune na pwin lo minimome k’i fo. Sé sa ni sava aprande ? Lo nonb i fé pa la kalité. In n’ot késtyon, i paré bande franssé i koné pa la zéografi : somanké kékpar néna d’moune i panss lé possib alé son kaz an wikinde. Mi éspèr ké non mé i koné pa avèk banna. Léspri kolonyal sé léspri boushé.

Mi sava rodi azot kékshoz mi rabash dopi dé zané é dé zané. I paré Clémenceau téi di : la guèr sé in n’afèr tro sèryé pou done sa bandee militèr pou okipé. Astèr mi diré : lédikassyon dann l’outromèr sé kékshoz tro sèryé pou konfté sa lédikassyon nassional an Franss.

A bon ékoutèr-salu.

Justin