La bouji i klèr d’moun. L’èstrésité i zoué lo mèm rol. Mé inn i sort pa dan l’ot. Pran in bouzi, aranz ali konm ou i vé, li done ar pa kouran ! Astèr kosa lo kozman i vé dir pou vréman ? Sa i vé dir pou vréman, sé ké ou i pé fé l’évolisyon dann in n’afèr, donk répar ali, amélyor ali, fé in méyèr z’afèr mé li lé touzour zanfan sak l’avé avan li ! Mé si ou i vé fèr in révolisyon, i fo ou i fé in nouvo dékouvèrt sansa in nouvo l’invansyon. In l’égzanp : si ou i vé shanj lo mond, i fo ou i trouv in tik-tak pou shanj lo mond ! Lo tik-tak i pé z’ète in nouvo filozofi. I pé z’ète osi in nouvo moiyin pou produi l’énèrzi ! i pé z’ète ankor in l’invansyon : la rou la pa shanj lo mond ? La bousol la pa shanj lo mond ? L’otonomi énèrzétik té i sava pa shanj La Rényon ? Alé ! Kalkil azot bien ! Ni artrouv pli d’van sipétadyé.