Ziska zordi, moin té i kroi in létré té in moun i koné bokou d’shoz, nana la kiltir, épi li gingn kozé, ékrir déssi bann sizé inportan, épi lir galman sak lé z’ot la ékri. Zordi, mi antann dir, in létré sé in moun la pa ilétré*. Sa lé for, sa !

Plis san dis mil ilétré
Issi La Rényon, nana lékol gratuite, obligatoir pou toute marmay o moins dépi laz sizan. Nana bann z’amontrèr an kantité, lékol byin roganizé, avèk sak i fo pou byin aprann lir, ékrir, konté. Sé la baz sa ! Mé, alé konprann pou kossa, nana, solon bann shif l’INSEE, in kantité z’ilétré, é i diminyé pa, ané pou ané. Konm di mon doktèr, lo malade lé éstasyonèr !

Sa in ilétré sa ?
Solman nana in késtyon konm k’i diré i bril lo boute mon lang. Si mi tronp pa, in Rényoné, si li vé ésplik son kont an kréol, zénéralman li yinbou. Kan li antann in zournal parlé an fransé, li traduir dann son tète. Parèy kan li lir in lète. Alors, sa in moun ilétré sa ?

Moin la konète épi mi koné ankor in bann dalon byin kiltiré an kréol, avèk in bon pé savoir, byin kapab tyinbo in konvèrsasyon. Pou moin, zot lé pa ilétré. Mi diré mèm, in pé an parmi i pé ète konsidéré konm létré dann promyé sans lo mo. Alors, létré an kréol, akoz pa ?

Nb : I paré, in ilétré sé in moun i gingn pa amène in konvèrsasyon konm k’i fo, i gingn pa lir in modékri, i gingn pa ékri son kat ti-mo.

Justin