Oté

« Lèv bonèr si ou i vé pou sèye répar avèk la min déga ou la fé avèk la boush ! »

In kozman pou a rout

Justin / 15 zwiyé 2019

JPEG - 43.6 ko

Mésyé, Médam, la sosyété, dann tout provèrb i parl souvan bann déga la parol i pé fé. Mi koné in provèrb i di : « Tienbo in mo sé égard in zami ! » é lo kontrèr lé évidan : koz an tro sé pèrd in zami. La pa d’moun k’i viv konm nou dann péi ladi-lafé, i pé donn la démanti. La boush, an vérité la lang, sa i pé fé bokou d’tor. Mi souvien in gramoun dann mon famiy téi di souvan dé foi an parlann sa sèr : la boush lé tayé pou di movèz shoz. Kalkil bien zot va oir ziska kèl poin kozman-la lé vré. A par k’sa, kan ou la fini fane mové parol donk mové santiman, mové pan sé, ou i pé mazine done in pti kado pou konpans lo mal fé. Malorozman, érèr dé la par in moun i oi lé shoz konmsa, i konpans arpa, pars lé pa posib konpansé é moin lé sir in moun va rapèl tout in vi kozman la fé mal ali, plito k’in kado la kado ali pou soidizan répar lo mal lété fé avèk la boush. Alé ! Mi kite azot rofléshi la dsi é ni artrouv pli d’van. Sipétadyé !