Zot i koné La Frans na gouvernman i fé souvan lo lapranti-sorsyé. Li aplik in règ par li mèm épi kan konsèy konstitisyonèl i donn ali in kou d’rès trankil, li di touzour li va trouv in kékshoz myé ankor é li pèrd ar pa lo tan pou sa. Dé sèrtène foi, li pran in nouvo loi, désèrténn foi lo tan i pass é konm. Sèr Ane bann fransé ni oi pa arien vnir. Lé konmsa inn-dé foi dan l’ané.

Na dé foi ou i pé pans, mèm si i di, "nil lé sansé pa konète la loi", ni koné bien la loi la pa in n’afèr bien koni par toulmoun mèm par sak na pou métyé d’fé la loi. Aprésa, lo parti o pouvoir i larg son bann shien-lou pou ésplik son rézon. Mé sa i fini kant mèm pars pou kosa va pèrd lo tan dsi in n’afèr konmsa, kan ou i pé pous pli d’van. Donk si mi di sa sé pars gouvèrnman i sort ramas in boush ta gèl avèk konsèy konstitisyonèl dsi in késtyonn kotizasion sosyal : li la pans, pou done bann ti travayèr in moné an plis, san déranj la bil lo patrona, diminyé mèm siprim bann kotizasion salarié pou in bonpé milyon travayèr, sak i gingn apèl bann travayèr pov. In pé té kontan pars konmsa zot nora gingn plis sink san éro dan l’ané. Domaz, konsèy konstitisyonèl la takl ali pars té i poz in jonou- konm i di dann zé domino !- èk lo prinsip l’égalité rant travayèr.

L’èr-la, mi rogard dann télé épi mi oi lo group lo progré la fé in konférans de près pou règ son kont èk ki ozis, mi konpran pa tro bien, mé pou règ in kont lo mèr Sin-Jo, épi lo sénatèr Vergoz la déshéné, mé san ariv a konvink pèrsone ké lo gouvèrman la’avé rézon fé in n’afèr konmsa fé sa... Solman i di pa nou, pou kosa gouvèrnman la pa désid sinploman goumant lo smic olèk fé in trikmardaz konm li la fé. A moins ké zot té i vé di anou François Hollande i pans bann ti kolon, mé d’ot non. Bien bon mé sa i ranpli pa la marmit bann travayèr pov, pars zot i koné zot la bézoin pouvoir d’asha mé shomin pou arivé la pa zot i doi trouvé. Aprésa i pé touzour dir : "La loi lé dir, mé sé la loi !" Konm bann zétidyan an droi i di souvan dé foi : "Lex dura, dura lex". Pli dir pou sak na poin, ké pou sak nana ! Lé pli grav ankor an avoir fééspèr d’moun kékhsoz plito ké riyin.

Justin

NB Diralex ? zot i koné sak i lé, La pa sa mèm bann vèr san kasab ?