Dalone é dalon, si mi anvoye azot so lézann-la, la pa in kritik vizavi d’zot pars mi koné bien zot i fé pa parti bann l’ékipaz ladi-lafé, épi mi koné osi lo gran réspé ké zot nana pou d’moun épi pou la répitasyon lo moun. Si mi anvoy azot sa sé sinploman pars mi trouv sé in gayar kont filozofik. Zot i koné Sokrate té in gran filozof. Konm i di in l’amouré la sazès donk pou moin lézann-la, pétète Sokrate la pa rakont sa, mé dizon fransman li noré bien pi rakonté.

Ala l’afèr :

In bon z’ami lo filozof Sokrate i di ali konmsa : « Mi vé rakont aou sak inn an parmi out bon dalon la fé ! ». Sokrate i arèt ali nèt, épi i di ali : « Avan ké ou i koz mi propoz aou fé pass out kozmann dann troi tami ».

« Lo promyé sé sète la vérité : Ou lé sir sak ou i sar di amoin lé vré pou vréman ? » Lo ga i réponn, li la pa vi la shoz par li mèm mé in moun la rakont ali. Lo filozof i fé pou romark : « Donk ou i sava rakont amoin in n’afèr é ou lé pa sir ké lé vré pou vréman. Ou i konpran bien sa la pa in n’afèr mi konsèy aou pou fèr ! »

« Mé m’a done aou ankor in dézyèm tami, sé sète la bonté : Ou lé sir ou i sava dir amoin in bon n’afèr dsi lo moun ? » Lo ga i réponn, la pa bon ditou, pars sak li sa rakonté lé pa in bon n’afèr ditou. Donk, lo filozof i di : « Ou i sava rakont amoin in n’afèr la pa sir lé vré é anplis sé in mové z’afèr ! Ou i oi sa la pa in n’afèr pou fèr san réfléshir ! »

« Mé m’a done aou in troizyèm tami : sé sète l’itilité… Ou lé sir sak ou i sava dir amoin lé itil pou dir ? Itil pou moin, pou ou, sansa in n’ot pèrsone ? » Lo moun i réponn li pans pa sé kékshoz itil pou rakonté.

Lo filozof i di ali : « Ou i sava rakont amoin kékshoz ou lé pa sir lé vré, anplis sé in mové z’afèr é ou i sort dir amoin sa lé mèm pa itil pou rakonté, donk i vo myé ou i di pa é lé shoz v’alé myé konmsa ».

Ala la lézann lé troi tami. Demoun i di sa in n’afèr lo filozof Sokrate la rakonté… Mi pans pa sa i mérite in doz la sigu pars i di li lé mor avèk poizon-la mé d’apré la lézann lé troi tami, mi pans la mor par anpoizoneman té i mérite pa li pars li té in moun vré, in moun bon, é in moun itil ankor zordi. Kosa zot i pans, zot, pèrsonèlman ? Si sak zot i vé dir lé vré, épi i fé parti la katégori dé bone shoz, é si lé itil an mèm tan, mi done azot lo konsèy pou alé di partou.