Mézami zot i koné kossa i vé dir fash èk son ri ? Kiltiré konm zot i lé, zot léktèr Témoignages, sa i étoneré amwin zot i koné pa sa. In kozman parèye ? Anval son kiyèr… Astèr mi panss zot la fine konprande oussa mi vé alé. Mi vé amenn azot dann trin lidantité.

Par l’fète, déssèrtin rante nou i proklam zot lé franssé é pou sa zot i ézite pa abandone zot lidantité rényoné mé la plipar d’tan zot lé rant dë kèr : zot i oz pi dir zot lé rényoné, mé zot i oz pa — antouléka kriye for — zot lé franssé. Si tèlman ké lalyénassyon i trape azot dë koté é zot i koné pi kèl koté zot lé déviré.

Sa i anpèsh pa nou kalkilé, rofléshi pou nou sèye artrouv anou tèl ké ni lé. Alé ! mi kite azot rofléshi la dsu é ni artrouv pli d’van. Sipétadyé.

Justin

*in zoli fraz lékrivin Axel Gauvin. a médité mézami.