Kosa sa i vé dir ? Sa i vé dir, afors lo moun i fors li fé mal ali pou vréman. Kan zot i kour, o sinonsa kan zot té i kour zot la zamé gingn in poinn koté ? Sa i fé mal po vréman. Kan in boksèr i gingn in kroshé dann foi, sa i afayi ali pou vréman. Li lé kapab tonm KO. Fé pète son fyèl, sé fé pète son vézikil bilyèr, sansa son foi, sansa son rate. Mi pansré sré plito la rate, pars si ou lé dératé, ou i fors é i paré ou lé pa fatigé ! Dsi lo sans prop mon shomin lé baré mé dsi lo sans figiré sa i vé dir ou i fors plis ké lé rézona b é ou i rod boubou pou out kor.

Kosa zot i anpans ? Arien ditou ! Fors pa tro sirtou, mé fé travay z’ot koko ! Fé bouy z’ot matyèr griz ! zot va oir ké rant-rant, ni pé z’ète tazantan dakor rantre nou.