Mi souvien, na in pé d’tan, moin lété apré koz-koz avèk désèrtin moun adéré dann Parti kominis rényoné. Momandoné la komans parl zournal. In pé i di, zot i lir “Témoignages” an priorité, kisoi lo zournal papyé, kisoi dsi lo nèt "nout zournal on ze web". In pé téi di zot i lir bann zournal zot i ashèt dann léstasion, épi “Témoignages” rarman. Mé pou zot sa la pa in inkonvényan, pars konm zot lé bien instruyé zot i gingn démay sak lé vré avèk sak lé fo. Lé pa fasil polué zot tèt, pars, konm di lo kont, dopi zot nésans zot la tèt do lé kominis, sé dir si zot lé kominis a-fon, dizon rouj-de-fon.

Moin pèrsonèl, mi oi pa lé shoz konmsa. Dizon, in léktèr li sèy démay lo vré avèk lo fo, l’èr-la mi poz amoin la késtyon : in zournal sé in marshandiz pou ashté, pou vann é souvan lo sansasyonèl li koup dovan la vérité. Lé vré la déformasyon, avèk lo tan li démask ali, konm lo mansonj mé i fo l’tan pou sa... Pran ninport ékèl évènman, alé oir koman la prézant lé shoz an débitan, épi koman avèk lo tan li la aparèt, zot va oir lé souvan pa parèy ditou. Donk, tout suit pou tout suit, a sho, li fout aou d’dan !

Dézyèm zafèr mi romark sé ké lo bann zidé dominant, sa i ranpli bann zournal i batiz azot indépandan. Déza, lékol, l’inivèrsité, dann ban diskisyon tou lé zour, dann télévizyon na in gran plas pou lo zidé dominant é out instriksyon la pa konm in vaksin pou sa. Dizon ou lé zamé iminizé ! Sirtou ké na poin pli pir ké bann zournal i di azot apolitik pou amenn la politik zour apré zour, moi apré moi, ané apré ané. Donk, si ou i gingn éskiv la propagann réaksyonèr, vréman i fo ou lé for é mi pans pa in moun lé asé for pou gingn fèr sa.

In n’ot lidé i pass dann mon tèt : in zournal, in radyo, in télé nana son prop kultur é ni vé ni vé pa, bann rédaktèr i tonm dann bin-l , a titré. Donk lo zournal i transform azot an vitès, pli vit ké ni kroi. Li gard son virzinité intéléktyèl d’apré zot ? Tintin, zing la boulète ! Kont dési, fyé pa tro !

NB : “Témoignages”, lé pa parèy mé nou va arparl de sa si zot i vé bien.

 Justin