Mésyé, médam, la sosyété kroir amoin sé kroir in kouyon-o pyé d’lo mir i oi lo mason. Pou kosa mi di sa ? Pétète zot néna in garson é l’amour l’apré blok son tète san ké zot, paran, zot i konpran kosa k’i ariv. Pétète zot néna inn fiy é l’apré blok son kèr pou in garson. A oui ! Zot va dir amoin mon garson sansa mon fiy i kash pa moin arien. Alé rodé ou ! I kash zot sirtou kan lo ka lé grav, sirtou kan sré nésésèr zot i kash pa arien papa-momon. Konbien momon, konbien papa néna la dépitasyon kan in n’afèr konmsa i ariv. Parl pa bann ka dézéspéré, pars moin lé pa la pou révèye in profon doulèr shé l’moun, mé pou parl bann ka i ariv tou lé zour. Anmaré ? Sé kan ou lé pri dann la d’ in réaksyon émosyonèl, sé kan ou lé pri dann la d’in réaksyon irasyonèl. Sé kan léspri lé anklavé é ou i gingn pa dézanklav ali. Alé ! Mi kite azot rofléshi la dsi mé ni koné ké - rofléshir dan in ka konmsa i ansèrv de rien - ni rotrouv pli d’van. Sipétadyé !