Médam zé méssyé, la sossyété, koz èk mwin sé koz èk in kouyon mé sé o pyé d’lo mir k’i oi lo masson.

Zot i koné la konpagni lo moindre éfor, é sirtou zot i koné bonpé kréol i yèmré fèr parti konpagni-la : gingn in boulo pa tro fatigant, épi assé bien péyé kant mèm konmsa wi zère oute transpirassion a l’ékonomi. Mwin lé sir zot i koné demoune i yèmré in travaye konmsa.

Astèr oussa sa i sorte kozman-la ? Si mi kroi lo gran Daniel Honoré dann son liv somi lo mo, kan wi travaye bitassion néna in plass lé roshèrvhé sé kan ou lé o bor d’lo shan : la méné lé pli kourte, é lo travaye lé mwin dir k’an plin milyé d’karo. Mi panss bande z’ansien zoinalyé agrikol i dédiré pa mwin.

Par kontre mi koné travaye plass bordaz sa lé roshèrché pars i domande pa ou tro, é pou ou sa lé pli fassil... O fète ! Mi kite azot rofléshi la dsi é ni rotrouv pli d’van.

Sipétadyé.